Ramadani: Përgjegjësia për krizën energjetike mbetet te mungesa e investimeve

Deputeti i Aleancës, Burim Ramadani, ka kritika të forta ndaj Qeverisë për menaxhimin e sektorit të energjisë, duke e vënë theksin te mungesa e kapaciteteve të reja prodhuese dhe mungesa e investimeve në gjashtë vitet e fundit. Gjatë një paraqitjeje televizive, ai ka përmendur se shpenzimet për blerjen e energjisë gjatë pesë vjetëve e gjysmë të fundit kanë kaluar shifrën prej një miliard eurosh.

Duke iu referuar paralajmërimeve të ministres së Ekonomisë, Artane Rizvanolli, për një dimër të vështirë në furnizim dhe çmime për shkak të zhvillimeve ndërkombëtare dhe konfliktit në Iran, Ramadani ka vënë në pikëpyetje qasjen e saj me deklaratën se «nuk e di nëse ministrja është ministre a është meteorologe». Ai ka shtuar se problemi kryesor mbetet mungesa e prodhimit shtesë në KEK dhe dështimi në zhvillimin e burimeve të ripërtëritshme të energjisë.