Pse i krahason Edi Rama protestuesit e Zvërnecit me fashistët e Musolinit?

TIRANË — Kryeministri Edi Rama ka reaguar sot lidhur me protestën që po zhvillohet për të 14-ën ditë radhazi kundër investimit të planifikuar në Zvërnec të Vlorës. Rama u ndal te sulmet e ashpra online ndaj këngëtarit Ylli Limani pas koncertit të tij të mbrëmshëm.

Kreu i qeverisë i cilësoi këto sulme dhe thirrjet për bojkot si shprehje të një fenomeni degradues në rrjetet sociale. Ai sqaroi se nuk e njeh Ylli Limanin dhe nuk e dëgjon muzikën e tij, por shtoi se kjo dhunë nuk duhet justifikuar apo heshtur.

Rama pretendoi se histeria ndërkombëtare e rrjeteve sociale po bie, pasi ajo ushqehet nga kundërshtitë ideologjike globale ndaj Presidentit amerikan. Sipas tij, Shqipëria është një shesh shumë i vogël për përsheshin global anti-Trump dhe asnjë ndërkombëtar nuk do të merrej me këtë projekt zhvillimi turistik.

Nga ana tjetër, ai u shpreh i shqetësuar për dallgën në rritje të dhunës verbale dhe kërcënimeve ndaj qytetarëve që nuk mbështesin protestën. Kryeministri përmendi thirrjet rrugëve si “çohuni nga kafja”, bllokimin e rrugëve dhe histerinë online në emër të atdheut që s'ka lidhje me paqen.

Sipas Ramës, historia tregon se lëvizjet e intolerancës shfaqen duke u imponuar me presion pseudo-moral dhe jo me argumente logjikë. Ai vuri në dukje rrezikun e shpalljes së tjetrit si tradhtar apo armik të popullit vetëm pse mendon ndryshe, duke paralajmëruar se kjo dëmton pulsin e demokracisë.

Për të ilustruar këtë rrezik, kryeministri solli shembuj historikë si skuadronet e zeza të Musolinit në Itali, militantët nazistë në Gjermani dhe Agimin e Artë në Greqi. Ai theksoi se këto lëvizje ekstremiste nisën pikërisht duke intimiduar kundërshtarët që ecnin në punët e tyre rrugëve.

Sipas kryeministrit, formulat e urrejtjes kur përqafohen nga grupime me mëri të shfrenuar sjellin pasoja të rënda. Ai sqaroi se protestuesit nuk duhen etiketuar si neo-fashistë, sepse shumë nga ushtruesit e dhunës online as nuk e dinë çfarë bëjnë, por theksoi se fjala është te kush dhunon online.

Burim: ATSH
— Redaksia ZHURMA