Pse akuzon Radevi Shkupin dhe i refuzon takimin Mickoskit?
Presidenti bullgar kërkon respektimin e konsensusit të vitit 2022 dhe thotë se nuk ka asgjë të re për të diskutuar me kryeministrin maqedonas.
SOFJE — Presidenti bullgar Rumen Radev lëshoi kritika të reja ndaj udhëheqjes së Maqedonisë së Veriut, duke akuzuar autoritetet në Shkup se "po bëjnë gjithçka që është e mundur" për të vonuar pranimin e vendit në BE. Ai tha se nuk sheh nevojë për takim të ri me kryeministrin Hristijan Mickoski.
Deklarata e Radevit vjen pas miratimit të raportit të fundit të progresit për RMV-në në Parlamentin Evropian. Dokumenti thekson detyrimet kyçe: zbatimin e Protokollit të Dytë të Marrëveshjes së Fqinjësisë së Mirë me Bullgarinë, rezultate konkrete nga Komisioni i Përbashkët Historik, dhe ndryshimet kushtetuese si parakusht për hapjen e grupit të parë të negociatave me BE-në.
Duke iu referuar mundësisë së takimit me Mickoskin, Radevi ishte kategorik: "nuk ka asgjë më shumë për të thënë." Ai këmbënguli se konsensusi i arritur në korrik 2022 "duhet të respektohet plotësisht" dhe premtoi se Bullgaria do të vazhdojë të insistojë në zbatimin e angazhimeve të marra.
Sofja dërgon kështu edhe një herë mesazhin e saj: përfshirja e bullgarëve në Kushtetutën e RMV-së, zbatimi i marrëveshjeve dypalëshe dhe përparimi i komisionit historik mbeten kushte kyçe. Bullgaria, thotë Radevi, do të këmbëngulë te bindja e udhëheqësve evropianë se ajo çka u ra dakord në korrik 2022 duhet të zbatohet.
Burim: Almakos
— Redaksia ZHURMA
