Qeveria shpronëson për aksin Elbasan–Qafë Thanë — ndahen 32.8 milionë lekë

TIRANË — Këshilli i Ministrave ka miratuar sot dy vendime për shpronësimin, për interes publik, të pronarëve të pasurive të paluajtshme private që preken nga realizimi i projekteve për zgjerimin e aksit rrugor Elbasan–Qafë Thanë. Vendimi i parë lidhet me projektin “Zgjerim i rrugës Elbasan–Përrenjas–Qafë Thanë, faza VIII”, për të cilin shpronësimi bëhet në favor të Autoritetit Rrugor Shqiptar (ARRSH).

Sipas vendimit, pronarët e pasurive të llojit “ndërtesë” dhe “truall” do të kompensohen në vlerë të plotë, me një fond të përgjithshëm prej 32 491 879,7 lekësh, i cili do të përballohet nga buxheti i shtetit përmes Fondit të Shpronësimeve. Ndërkohë, shpenzimet procedurale prej 50 mijë lekësh do të mbulohen nga buxheti i Autoritetit Rrugor Shqiptar.

Vendimi parashikon që procesi i shpronësimit të nisë menjëherë pas botimit në “Fletoren zyrtare” dhe të përfundojë brenda tre muajve nga hyrja e tij në fuqi. Kompensimi i pronarëve do të kryhet pasi ata të paraqesin dokumentacionin përkatës pranë Agjencisë Shtetërore për Shpronësimin.

Me një vendim të dytë, qeveria miratoi shpronësimin e pronarëve të pasurive private që preken nga realizimi i projektit “Zgjerimi i rrugës Elbasan–Qafë Thanë (faza I)”. Për këtë projekt, kompensimi do të kryhet për sipërfaqe të kategorisë “arë”, me një vlerë të përgjithshme prej 278 400 lekësh, e cila gjithashtu do të financohet nga Fondi i Shpronësimeve.

Të dy vendimet hyjnë në fuqi menjëherë dhe botohen në “Fletoren zyrtare”.

Burim: ATSH, https://ata.gov.al/2026/07/30/qeveria-shpronesime-ne-funksion-te-zgjerimit-te-aksit-elbasan-qafe-thane/
— Redaksia ZHURMA