Qeveria miraton dy centrale fotovoltaike dhe zgjeron 'Blue 2' në Fier

TIRANË — Këshilli i Ministrave ka miratuar ndërtimin e dy centraleve të reja fotovoltaike në bashkitë Devoll dhe Gramsh, si dhe rritjen e kapacitetit të një impianti ekzistues në Fier. Këto projekte synojnë shtimin e kapaciteteve të energjisë së rinovueshme pa përfituar nga masat shtetërore të mbështetjes financiare apo koncesionet.

Në Bashkinë e Devollit, shoqëria “DEVOLLI SUNPOWER” sh.p.k. do të ndërtojë një impiant me kapacitet të instaluar prej 15 MW. Ky projekt parashikohet të përfundojë brenda 36 muajve dhe do të operojë për 49 vjet. Kompania detyrohet të paguajë një detyrim royalty prej 2% të prodhimit vjetor në buxhetin e shtetit.

Projekti i dytë do të zhvillohet në Bashkinë e Gramshit nga shoqëria “ONE SOLAR” sh.p.k., me një kapacitet prej 11,5 MW. Impianti do të shtrihet në zonat e fshatrave Drizë, Gjergjovinë dhe Cingar i Poshtëm. Ky investim ka të njëjtat afate ndërtimi dhe detyrime ligjore, përfshirë dorëzimin e garancisë prej 5% të investimit.

Ndërkohë, qeveria ka ndryshuar vendimin e vitit 2021 për centralin “Blue 2” në Sheq-Marinas të Fierit, duke e rritur kapacitetin e tij në 100 MW. Ky impiant po zhvillohet nga shoqëria “SPV BLUE 2” sh.p.k., po ashtu pa asnjë mbështetje shtetërore, duke u kthyer në një nga projektet më të mëdha private të energjisë.

Këto vendime dëshmojnë se sektori i energjisë fotovoltaike po zhvillohet kryesisht përmes investimeve private, ku rreziqet financiare u lihen vetëm kompanive.

Burim: ATSH
— Redaksia ZHURMA