Çfarë po tenton Qeveria e Kurtit me rregulloret e Odës së Avokatëve?

PRISHTINË — Oda e Avokatëve të Kosovës ka reaguar me shqetësim dhe kundërshtim të fortë ndaj përpjekjeve të Qeverisë së Republikës së Kosovës për të pezulluar dy rregullore të brendshme të saj: rregulloren për shpenzimet e regjistrimit dhe rregulloren për trajtimin e thirrjeve në sistemin e avokatëve sipas detyrës zyrtare (ex officio).

OAK thekson se këto akte janë miratuar nga organet e saj kompetente në përputhje me Ligjin për Avokatinë dhe Statutin e saj. "Oda e Avokatëve të Kosovës nuk është organ i pushtetit ekzekutiv, nuk është departament i Ministrisë së Drejtësisë, nuk është institucion që vepron sipas orientimeve të qeverive të radhës", thuhet në reagim.

Oda paralajmëron se çdo tentim për pezullimin e tyre krijon një precedent të rrezikshëm ku ekzekutivi mund të ndërhyjë në vendimmarrjen e institucioneve të pavarura. Kjo, sipas saj, cënon parimet e ndarjes së pushteteve, sigurinë juridike dhe sundimin e ligjit.

Oda e Avokatëve shton se do të përdorë të gjitha mjetet juridike për të mbrojtur pavarësinë e saj dhe kompetencat e garantuara me ligj.

Burim: Insajderi
— Redaksia ZHURMA