Qeveria krijon regjistrin e kanabisit — nga kultivimi te asgjësimi
Regjistri do të administrohet nga Agjencia Kombëtare e Kontrollit të Cannabis-it
TIRANË — Qeveria ka miratuar krijimin e Regjistrit Elektronik Kombëtar për cannabis-in për qëllime mjekësore dhe industriale. Regjistri do të monitorojë të gjithë ciklin e aktivitetit të subjekteve të licencuara, nga aplikimi për licencë deri te prodhimi, transporti, eksporti, kontrollet dhe asgjësimi.
Sipas vendimit, regjistri do të administrohet nga Agjencia Kombëtare e Kontrollit të Cannabis-it, ndërsa ndërtimi dhe mirëmbajtja teknike do të realizohen nga Agjencia Kombëtare e Shoqërisë së Informacionit (AKSHI).
Sistemi do të integrohet me e-Albania, Qendrën Kombëtare të Biznesit, Tatimet, Doganat, Gjendjen Civile dhe platformën e gjurmueshmërisë “ALBTrace CO”. Në regjistër do të pasqyrohen të gjitha të dhënat mbi licencat, kultivimin, përpunimin, sasitë e prodhuara, analizat laboratorike, transportin, eksportin, inspektimet, masat administrative, si edhe detyrimet tatimore dhe deklaratat doganore.
Akses në sistem do të kenë institucionet përgjegjëse, përfshirë ministritë, Doganat, Tatimet, Policinë e Shtetit dhe subjektet e licencuara. Vendimi detyron subjektet të raportojnë të dhëna të sakta dhe në kohë. Mosraportimi ose deklarimi i informacionit të pasaktë do të konsiderohet shkelje, ndërsa Agjencia e Cannabis-it do të ketë të drejtë të korrigjojë të dhënat dhe të pezullojë menjëherë aksesin në rast të shkeljeve.
Burim: Gazeta Si
— Redaksia ZHURMA