Punimet në shëtitoren Taulantia vazhdojnë të papërfunduara — afati i qershorit kaloi

DURRËS — Punimet në pjesën fundore të shëtitores "Taulantia" mbeten ende të papërfunduara, megjithëse nisën vitin e kaluar e duhej të ishin mbyllur brenda qershorit, sipas premtimeve të kryetares së Bashkisë Emiriana Sako e të inxhinierit të firmës zbatuese.

Në kantierin në një nga hapësirat publike më të frekuentuara të qytetit, për të dytën verë radhazi mungojnë punëtorët dhe mjetet e rënda. Investimi ishte planifikuar të zgjasë tetë muaj, por edhe ky punim publik nuk përfundoi brenda afateve të parashikuara.

Qytetarët e konsiderojnë të papranueshme lënien përgjysmë të punimeve gjatë sezonit turistik. "Punimet nuk duhen lënë kurrë në mes... një herë u lanë pas dore, tani janë lënë sërish", thotë një prej tyre. Ndërkohë kantieri shërben si vend grumbullimi mbeturinash, duke dëmtuar pamjen e shëtitores e përvojën e vizitorëve.

Burim: Euronews Albania
— Redaksia ZHURMA