Pse po zbrazet Struga nga nxënësit?
Numri i nxënësve ka rënë me 3000 në 20 vjet, ndërsa stafi rritet. Çfarë synon Komuna?
STRUGË — Komuna e Strugës përballet me një rënie alarmante të numrit të nxënësve, me 3000 më pak gjatë dy dekadave të fundit. Vendbanimet rurale, dikur të mbushura me fëmijë, sot janë pothuajse të zbrazëta, ndërsa numri i paraleleve në klasat më të larta bie çdo vit.
Xhemi Hajredini, udhëheqës i Sektorit për Arsim, shpjegon se dy janë arsyet kryesore: niveli i ulët i natalitetit dhe migrimi. Megjithatë, një dukuri interesante është rritja e numrit të të punësuarve, pavarësisht zvogëlimit të nxënësve. "Në 20 vjet, Struga ka 3000 nxënës më pak, ndërsa në 5 vjet, 500 më pak," thotë ai.
Kryetari i Komunës, Mendi Qyra, mbështet racionalizimin e shkollave, duke theksuar se Ministria e Arsimit dhe UNICEF-i kanë kërkuar masa. "Kemi paralele me nga një nxënës, ku për një nxënës ka deri në 30 mësimdhënës. Kjo është barrë financiare dhe mungesë socializimi," shpjegon Qyra, duke shtuar se nuk do të ketë largime të mësimdhënësve.
Plani i komunës parashikon mbylljen e 8 shkollave fillore rajonale nga shtatori, ndërsa nxënësit do të vazhdojnë mësimin në shkollat më të afërta. Më pas, do të mbyllen edhe 4 shkolla qendrore në fshatrat Jabllanicë, Drsllajcë, Tatesh dhe Podgorcë, të cilat do të bashkohen me shkolla të tjera. Vendimi përfundimtar varet nga Këshilli i Komunës.
Burim: Telegrafi
— Redaksia ZHURMA