Pse po kërcënohet mbyllja e shkollës fillore në Kosturnik?

KUMANOVË — Banorët e fshatit Kosturnik, në bashkëpunim me qytetarë të tjerë të Kumanovës, kanë nisur një peticion kundër vendimit të drejtores qendrore të Tabanocës për mbylljen eventuale të shkollës fillore të fshatit që nga shtatori i këtij viti.

Sahit Qerimi, një banor i Kosturnikut, shprehet ashpër kundër këtij vendimi: "Nuk është në rregull, ata mezi e kanë hapur shkollën dhe tani po flasin për mbyllje. Fëmijët e vegjël nuk mund të shkojnë në Kumanovë — distanca është e madhe dhe kërkon shoqërim nga prindërit."

Rexhail Aziri, një tjetër qytetar, thekson se shkolla u hap me përpjekjet e banorëve dhe kërkon që ajo të mbetet e hapur: "Banorët e kanë ndërtuar këtë shkollë me mjete të veta dhe nuk duhet të mbyllet. Institucionet duhet të gjejnë zgjidhje për të vazhduar arsimin këtu, jo të detyrojnë fëmijët të udhëtojnë larg."

Hajdin Azemi, një prind, shpreh frikën se mbyllja e shkollës do të detyrojë familjet të emigrojnë: "Unë u ktheva nga Gjermania për t’i dhënë fëmijëve të mi mundësinë të mësojnë në vendlindje dhe të jenë afër familjes së tyre. Nëse shkolla mbyllet, do të jem i detyruar të largohem përsëri."

Në një takim joformal midis kryesisë së fshatit dhe përfaqësuesve të komunës, u dhanë premtime se vendimi do të shqyrtohet në nivele më të larta. Sektori për Arsim në Komunën e Kumanovës deklaroi se janë kundër mbylljes së shkollave fillore dhe presin miratimin e paraleleve për vitin e ri shkollor.

Sipas të dhënave të sektorit, deri më 1 qershor 2026, në klasën e parë të 16 shkollave fillore janë regjistruar 863 nxënës, nga të cilët 772 në shkollat qendrore dhe 91 në shkollat rajonale. Ministria e Arsimit ka udhëzuar për optimizimin e rrjeteve shkollore, duke lejuar formimin e paraleleve edhe me më pak se 20 nxënës.

Shkolla e Kosturnikut nuk është e vetmja në rrezik — ministrja e Arsimit, Janevska, ka paralajmëruar për riorganizimin e sistemit arsimor fillor dhe të mesëm në të gjithë vendin.

Burim: TV21
— Redaksia ZHURMA