Pse mungoi Bashkia e Tiranës në dëgjesën për reformën territoriale?
Jorida Tabaku denoncon mungesën e përfaqësuesve të bashkisë më të madhe në vend dhe thellimin e pabarazive mes qendrës dhe periferisë së kryeqytetit.
TIRANË — Deputetja e Partisë Demokratike, Jorida Tabaku, ka denoncuar mungesën e përfaqësueses së Bashkisë së Tiranës në mbledhjen e komisionit të posaçëm për Reformën Territoriale. Ajo e cilësoi këtë mungesë si një shenjë të qartë të papërgjegjshmërisë së pushtetit vendor dhe qeverisë ndaj llogaridhënies publike përpara qytetarëve.
Sipas Tabakut, është tërësisht e papranueshme që drejtuesja e komanduar e bashkisë që administron rreth një të tretën e popullsisë së vendit të shmangë raportimin përpara deputetëve. Ky vendim nuk tregon vetëm mungesë respekti ndaj institucionit parlamentar, por dëshmon funksionimin e një sistemi që nuk jep llogari për fondet.
Në fjalën e saj, deputetja e opozitës ngriti shqetësime serioze për përqendrimin e investimeve në kryeqytet. Ajo theksoi se rreth 70% e investimeve publike janë përqendruar në zonat urbane qendrore, ndërkohë që periferitë dhe ish-komunat e largëta vazhdojnë të vuajnë sot mungesën e investimeve dhe shërbimeve më bazë.
Një tjetër problem i evidentuar ishte rritja e jashtëzakonshme e administratës. Tabaku vuri në dukje se në vitin 2015 Bashkia e Tiranës kishte rreth 5 mijë punonjës, kurse sot numri i tyre ka arritur në rreth 9 mijë, pa sjellë asnjë përmirësim real në cilësinë e shërbimeve të përditshme.
Duke përmendur aferën e inceneratorit dhe mungesën e planifikimit urban, deputetja kërkoi një dëgjesë të posaçme me drejtuesit aktualë dhe me përfaqësuesit e ish-komunave. Ajo theksoi se qyteti më i madh në vend nuk mund të mbahet peng nga një administrim i përkohshëm që nuk jep llogari.
Burim: ATSH
— Redaksia ZHURMA