Mattarella: Bashkimi Evropian është i paplotë pa Shqipërinë

Presidenti i Italisë, Sergio Mattarella, ka deklaruar se Bashkimi Evropian do të mbetet i paplotë pa anëtarësimin e Shqipërisë dhe vendeve të tjera kandidate. Gjatë takimit të zhvilluar në Pallatin Presidencial Quirinale me Presidentin e Shqipërisë, Bajram Begaj, kreu i shtetit italian shprehu mbështetjen e vendit të tij për integrimin evropian të Ballkanit Perëndimor. «Italia do ta konsiderojë gjithmonë Bashkimin Evropian të paplotë dhe të gjymtuar, derisa pjesë e tij të bëhen Shqipëria dhe vendet e tjera kandidate, gjë që shpresoj të ndodhë sa më shpejt», u shpreh Mattarella.

Kreu i shtetit italian theksoi se procesi i integrimit përfaqëson një projekt të qëndrueshëm paqeje, lirie dhe përparimi për popujt e rajonit. Gjatë këtij takimi, ku mori pjesë edhe një delegacion kryetarësh të bashkive italiane nga territoret ku jetojnë komunitete arbëreshe, u vlerësua lart roli i tyre si shembull i miqësisë dhe integrimit të suksesshëm. Sipas Mattarellës, ruajtja e gjuhës, kulturës dhe rrënjëve nuk përbën pengesë për integrimin, por kontribuon në pasurimin e shoqërisë, ndërsa mbrojtja e pluralizmit mbetet shtyllë e demokracisë dhe parim themelor i Evropës.