Pse mbyllja e qumështores 'Vita' dëmton ekonominë e Kosovës?

PRISHTINË — Lidhja e Bizneseve të Kosovës (LBK) ka reaguar ashpër ndaj mbylljes së qumështores „Vita“, duke e cilësuar atë si një goditje të drejtpërdrejtë ndaj ekonomisë së vendit dhe prodhimit vendor. Kryetari i LBK-së, Besart Dreshaj, ka theksuar se „Vita“ është një nga prodhuesit më të rëndësishëm vendorë, që posedon të gjitha certifikatat dhe plotëson standardet e kërkuara.

„Mbyllja e Qumështores VITA nuk është vetëm çështje e një kompanie, por një goditje e rëndë për ekonominë e Kosovës,“ shkroi Dreshaj në Facebook. Ai vuri në dukje se vendimi dëmton besimin në institucionet dhe klimën e të bërit biznes, duke theksuar se çdo ministër duhet të kuptojë se masa të tilla nuk i bëjnë nder as institucioneve, as politikës.

Pasojat e këtij vendimi prekin jo vetëm kompaninë, por edhe qindra punëtorë, fermerë dhe furnizues të lidhur me zinxhirin e prodhimit të qumështit. Dreshaj paralajmëroi se mbyllja e një prej prodhuesve më të mëdhenj vendorë rrezikon humbjen e qindra vendeve pune dhe dëmton tregjet e brendshme dhe të jashtme, duke hapur rrugën për rritjen e importeve.

Sipas tij, zhvillime të tilla dërgojnë sinjale negative edhe për investitorët vendorë dhe të huaj, duke cenuar stabilitetin ekonomik dhe besimin në mjedisin e biznesit. „Bizneset nuk janë objekt eksperimentesh politike apo vendime që shkatërrojnë prodhimin vendor,“ theksoi Dreshaj, duke kërkuar që institucionet të veprojnë me përgjegjësi në interes të ekonomisë së Kosovës.

Burim: Gazeta Metro
— Redaksia ZHURMA