Pse këpucët rozë po dominojnë në Botërorin 2026?
Një trend i modës dhe strategjia e marketingut po mbushin fushën e blertë me ngjyrën e vitit 2026.
NJU JORK — Gjatë ndeshjeve të Kupës së Botës 2026, një detaj i veçantë ka tërhequr vëmendjen e shikuesve: këpucët rozë po dominojnë në fushë. Sulmuesit, mesfushorët, mbrojtësit dhe portierët po zbresin në lojë me këto nuanca, duke e kthyer këtë ngjyrë në një nga simbolet më të dukshme të turneut.
Sipas mediave italiane dhe ekspertëve, ky trend nuk vjen nga një marrëveshje mes lojtarëve, por buron nga bota e modës. Instituti Pantone identifikoi nuancat rozë si dominuese për sezonin Pranverë-Verë 2026, ndërsa gjigantët Nike, Adidas, Puma dhe New Balance i përfshinë ato në koleksionet e tyre para fillimit të Botërorit.
Ngjyra rozë krijon një kontrast të fortë me gjelbërimin e fushës, duke rritur dukshmërinë në televizion, fotografi dhe rrjete sociale si TikTok apo Instagram. Në një kohë kur momentet kryesore të lojës shpërndahen brenda pak sekondave, ky kontrast vizual mbart një vlerë të jashtëzakonshme marketingu për kompanitë sportive.
Odinga Nimako nga Nike shpjegoi se kjo ngjyrë e ndritshme krijon ndjesinë se duhet të jesh lojtar i madh për ta veshur. Ajo që dikur konsiderohej zgjedhje individuale e guximshme, sot është kthyer në një trend global që po tërheq vëmendjen më të madhe në Botëror.
Burim: Insajderi
— Redaksia ZHURMA