Pse foshnjat e lindura në spitale private po lihen jashtë vizitave shëndetësore?
Prindërit ankohen se programi i Ministrisë së Shëndetësisë për vizitat e fëmijëve deri në moshën 3-vjeçare nuk po i përfshin lindjet në sektorin privat.
PRISHTINË — Edhe pse Ministria e Shëndetësisë raporton mijëra vizita në shtëpi për fëmijët nën moshën tri vjeçare, disa prindër janë ankuar se foshnjat e tyre nuk janë vizituar asnjëherë. Sipas tyre, ky program shtetëror i vizitave mobile shëndetësore po i lë anash rastet kur lindjet kryhen në institucione private.
Një nënë nga Komuna e Podujevës ka treguar në kushte anonimiteti se foshnja e saj ka mbushur moshën katërmuajshe, por vizitat në shtëpi kanë munguar plotësisht. Ajo ka lindur në shkurt në një institucion privat dhe fëmijën e ka regjistruar në QKUK, por ende nuk ka pranuar asnjë vizitë.
Po ashtu, një nënë nga Ferizaj ka deklaruar se foshnja e saj tashmë gjashtëmuajshe nuk është vizituar asnjëherë pas lindjes në spital privat. Ajo dyshon se spitalet private nuk po i dorëzojnë me rregull të dhënat e të porsalindurve te institucionet publike shëndetësore.
Sipas programit zyrtar të Ministrisë, vizita e parë duhet të kryhet në ditët e para pas lindjes, ndërsa ajo pasuese mes muajit të katërt dhe të gjashtë. Ministria e Shëndetësisë megjithatë insiston se ky program i përfshin të gjithë fëmijët pa dallim institucioni.
Sipas tyre, listat e të porsalindurve sigurohen nga SHSKUK-ja vetëm kur lindjet kryhen në Klinikën e Gjinekologjisë apo spitalet e përgjithshme, kurse vizitat realizohen nga ekipet e QKMF-së. Por Ministria nuk ka treguar se si saktësisht i merr të dhënat nga klinikat private.
Si sfida kryesore që pengojnë zbatimin e plotë, institucionet kanë përmendur numrat e pasaktë të telefonit, ndryshimin e vendbanimit të familjeve dhe refuzimin e vizitave nga vetë prindërit. Megjithatë, gjatë vitit 2025 u raportuan gjithsej 35 mijë e 170 vizita në terren.
Për të mbuluar nevojat, numri i infermierëve të angazhuar në zbatimin e programit është rritur ndjeshëm nga 331 në vitin 2025, në 1 mijë e 132 infermierë gjatë vitit 2026. Ky zgjerim synon të mbulojë vizitat për nënat shtatzëna dhe fëmijët në 30 komuna.
Burim: Koha.net
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.