Pse është rikthyer ndotja masive në Liqenin e Badocit?

PRISHTINË — Liqeni i Badocit, një nga burimet kryesore dhe më të rëndësishme të furnizimit me ujë të pijshëm për Prishtinën dhe zonat përreth, po përballet sërish me një alarm mjedisor. Hapësirat përreth këtij ujëmbledhësi janë mbuluar nga sasi të mëdha mbeturinash, duke ngritur shqetësime serioze për cilësinë e ujit dhe shëndetin e qytetarëve.

Në këtë situatë ka reaguar organizata "Ta pastrojmë Kosovën", e cila ka publikuar fotografi që dëshmojnë praninë e mbeturinave në afërsi të digës. Sipas aktivistëve, është shqetësuese që kjo papastërti po rikthehet në po ato zona që ishin pastruar më parë me aksione vullnetare.

Përfaqësuesit e organizatës theksojnë se ky problem i përsëritur nuk mund të zgjidhet dot vetëm përmes iniciativave dhe aksioneve vullnetare të qytetarëve. Ata kërkojnë angazhim institucional për mbrojtjen e ekosistemit, përfshirë kontrolle më të shpeshta në terren dhe zbatim të masave ndëshkuese ndaj ndotësve.

Neglizhimi i situatës mund të sjellë pasoja të rënda për ujin e pijshëm. Kujtojmë se më parë ishte paralajmëruar se ndotja në Liqenin e Badovcit kërkonte zgjidhje afatgjate për të parandaluar krizat mjedisore në këtë zonë me interes të lartë publik.

Burim: IndeksOnline
— Redaksia ZHURMA