Pse Demi e quan skandal mospërfshirjen e Kosovës në gazin amerikan?

PRISHTINË — Mentor Demi, ekspert i minierave nga Oda e Minierave të Kosovës, ka paralajmëruar se mospërfshirja e Kosovës në projektin e gazit amerikan (LNG) do të ishte "skandal në vetvete", duke theksuar se edhe Serbia, e cila nuk është aleate e SHBA-së, e ka pranuar atë. Në emisionin EURO n’T7, Demi ka vënë në dukje se gasifikimi i thëngjillit, projekt për të cilin insiston qeveria, mund të realizohet, por kërkon deri në 15 vjet për t’u zbatuar.

Sipas tij, Kosova ka rezerva të mjaftueshme thëngjilli — renditet e treta në Evropë dhe e pesta në botë — por aktualisht nuk ekziston asnjë studim fizibiliteti që tregon se si mund të zhvillohet gasifikimi, cilat janë përfitimet dhe pasojat e tij. Demi ka sugjeruar që, paralelisht me hartimin e një studimi të tillë, i cili mund të zgjasë 2-3 vjet, Kosova të mbështesë projekte me rëndësi gjeopolitike, siç është LNG-ja amerikane.

Eksperti ka shpjeguar se gasifikimi i thëngjillit do të ishte më efikas nëse qymyri ndodhet i varrosur thellë nën shtresa shkëmbore, duke shmangur ndotjen direkte në sipërfaqe. Megjithatë, ai ka kërkuar një debat publik të bazuar në argumente teknike dhe ekonomike për secilin projekt, në vend që të favorizohet njëra opsion pa analizë. "Debati duhet të zhvillohet për secilin projekt, jo vetëm të thuhet se gasifikimi bën, ndërsa gazi amerikan nuk bën," ka theksuar Demi.

Projekti i LNG-së, sipas tij, është strategjik për Kosovën, pasi ofron diversifikim të burimeve energjetike dhe lidhje me aleatët perëndimorë. Qeveria ka shprehur interes për gazin amerikan, por debati publik mbetet i kufizuar.

Burim: Gazeta Express
— Redaksia ZHURMA