Pse akuzohet polici i Dibrës për shpërdorim detyre?
Megin Gani Ademi, 32 vjeç, dyshohet se nuk ka kryer veprimet për largimin e shtetasit Amir Muaremi, i cili ishte në proces ekstradimi drejt Gjermanisë.
DIBËR — Agjencia e Mbikëqyrjes Policore, Drejtoria Rajonale Kukës-Dibër, ka arrestuar Megin Gani Ademin, 32 vjeç, Specialist për Hetimin e Krimeve në Komisariatin e Policisë Dibër, i akuzuar për shpërdorim detyre. Sipas AMP-së, nga hetimet paraprake ka rezultuar se efektivi dyshohet se nuk ka kryer veprimet hetimore dhe procedurale të nevojshme.
Veprimet e pakryera lidheshin me largimin e shtetasit Amir Muaremi, i cili ndodhej nën masën e sigurisë "arrest në shtëpi" dhe ishte në proces ekstradimi drejt Republikës Federale të Gjermanisë.
Në përfundim të veprimeve të para hetimore, materialet procedurale i janë referuar, sipas JavaNews, Prokurorisë pranë Gjykatës së Shkallës së Parë të Juridiksionit të Përgjithshëm Dibër, e cila do të vijojë me veprimet e mëtejshme ligjore.
Burimet: Report Tv, JavaNews
— Redaksia ZHURMA