PS dorëzon reformën territoriale pa PD-në — 61 bashki bëhen 46

TIRANË — Deputetët e grupit parlamentar të PS-së i dorëzuan të enjten kryetarëve të bashkive dhe këshillave bashkiakë propozimin e ri për shkrirjen e 15 bashkive, vetëm me firmën e tyre, pasi nuk u arrit konsensus me PD-në brenda Komisionit të Posaçëm Parlamentar për Reformën Administrativo-Territoriale.

Sipas projektligjit “Për ndarjen Administrative Territoriale të Njësive të Qeverisjes Vendore”, numri i bashkive bie nga 61 në 46. Krijohet një nivel i ri organizimi, “qyteti”, që zëvendëson skemën aktuale “Bashki – Njësi Administrative” me skemën e re “Bashki – Qytet – Njësi Administrative”.

Harta e re parashikon 12 qarqe, 46 bashki, 71 qytete përbërëse dhe 387 njësi administrative; 20 bashki do të kenë më shumë se një qytet në përbërje, ndërsa 28 bashki aktuale konsolidohen për të formuar 13 bashki të reja. Bashkitë kanë 60 ditë afat ta shqyrtojnë dhe konsultojnë propozimin me qytetarët.

Propozimi vjen pas dëgjesash publike në 11 qarqe dhe konsultimeve me mbi 3.500 qytetarë, përfaqësues vendorë, të biznesit, universitetesh dhe shoqërisë civile. Niveli i ri “qytet” synon t'i përgjigjet gjetjeve të raportit analitik dhe kërkesave për një model më të mirë përfaqësimi, thotë PS.

Kryetari i PD-së, Sali Berisha, e kundërshtoi propozimin, duke thënë se “Edi Rama tërhiqet de facto nga reforma territoriale” dhe akuzoi PS-në se ka parashikuar shkrirjen e 25 bashkive “nga Konispoli në Krumë”. Sipas Faktoje, kjo shifër rezulton e pavërtetë krahasuar me numrin e vërtetë prej 15 bashkish më pak.

Bashkëkryetari i Komisionit të Reformës Territoriale nga radhët e PD-së, Luçiano Boçi, e quajti hartën “një thikë pas shpine ndaj qytetarëve dhe territorit”, duke e cilësuar draftin “produkt unilateral” të paraqitur pasi komisioni kishte mbyllur mandatin, pa debat apo raport të përbashkët.

Ekspertët e pushtetit vendor mbeten të ndarë: Agron Haxhimali thotë se bashkitë më të mëdha rrisin kapacitetin administrativ, por rrezikojnë të largojnë vendimmarrjen nga qytetarët; Afrim Krasniqi vëren se konsultimet treguan mungesë dakordësie brenda vetë partive dhe mes tyre.

Burim: Faktoje
— Redaksia ZHURMA