Protesta vazhdon te Kryeministria, oratorët fajësojnë Ramën për dhunën policore
Para Kryeministrisë, protestuesit paralajmërojnë një protestë mbarëkombëtare me pjesëmarrje të pritshme të diasporës.
TIRANË — Disa orë pas dhunës së ushtruar nga policia para Kuvendit të rrethuar me barriera metalike, protestuesit u mblodhën para Kryeministrisë më 27 korrik, në ditën e 58-të të protestave kundër qeverisë. Nga podiumi, oratorët akuzuan drejtpërdrejt kryeministrin Edi Rama se kishte urdhëruar vetë dhunën jo proporcionale, me qëllim shtypjen e protestës.
Protestuesit thanë se nuk do të intimidohen dhe nuk do të tërhiqen nga sheshi derisa Rama dhe qeveria socialiste të japin dorëheqjen. Ata pretenduan gjithashtu se drejtues të lartë të policisë kishin urdhëruar efektivë nga qytete të tjera të angazhoheshin, me qëllim frikësimin e protestuesve dhe shpërbërjen e tubimit.
Sipas protestuesve, një protestë e re mbarëkombëtare do të shpallet së shpejti, me pritje që edhe diaspora shqiptare të bashkohet masivisht. Pas më shumë se dy orësh para Kryeministrisë, ata marshuan nëpër rrugët kryesore të kryeqytetit.
Burim: Syri.net
— Redaksia ZHURMA