Protestë më 19 nëntor për pagat në Korporatën Energjetike të Kosovës

Sindikata e Re e Punëtorëve të Korporatës Energjetike të Kosovës ka paralajmëruar një tubim të radhës më 19 nëntor në Prishtinë. Sipas njoftimit zyrtar, protesta do të nisë në ora 11:00 para Drejtorisë së KEK-ut, në objektin TOSKAN, me kërkesa të pandryshuara deri në përmbushjen e tyre.

Dy kërkesat kryesore të punonjësve mbeten ngritja dhe nivelizimi i pagave, si dhe realizimi i pagës së 13-të për të gjithë punëtorët e korporatës. Sindikata ka theksuar se ky organizim është vazhdimësi e përpjekjeve për mbrojtjen e të drejtave dhe dinjitetit të punonjësve.

Organizatorët u kanë bërë thirrje gjithë punëtorëve që të marrin pjesë masivisht dhe të qëndrojnë të bashkuar. «Bashkimi ynë është fuqia jonë! Zëri i punëtorëve nuk mund të injorohet!», thuhet në mesazhin e sindikatës.