Çfarë kërkojnë protestuesit për Zvërnecin në ditën e 13-të të marshimit në Tiranë?

TIRANË — Ditën e trembëdhjetë të protestës kundër investimit të planifikuar në Zvërnec të Vlorës, qytetarët dhe aktivistët u mblodhën në sheshin “Skënderbej”. Ata marshuan përgjatë bulevardit drejt Kryeministrisë, duke shpalosur pankarta dhe duke kërkuar dorëheqjen e Kryeministrit Edi Rama dhe largimin e Berishës nga drejtimi i opozitës.

Në foltoren e ngritur për protestën, koordinuesit u bënë thirrje qytetarëve të kërkojnë dorëheqjen e kryeministrit, i cili ndodhej pranë në aktivitetin e 35-vjetorit të themelimit të PS-së në sheshin “Italia”. Gjithashtu u kërkua hetimi i pasurive të politikanëve dhe u shpreh kundërshtimi ndaj shitjes së pasurive kombëtare.

Gjatë marshimit u dëgjuan thirrje si “Shqipëria e shqiptarëve, jo e tradhtarëve”. Një protestues i larguar prej tetë vitesh në Londër bëri thirrje që diaspora të bashkohet në protestë, pasi me kthimin e tij gjeti vetëm grataciela në Tiranë dhe një rini që kishte braktisur vendlindjen.

Përfaqësuesja e grupit koordinues bëri thirrje për bojkotim të mediave të cilat i quajti të shitura, por kërkoi mirëkuptim për gazetarët në shesh. Ajo po ashtu pretendoi se edhe punonjësit e administratës që po merrnin pjesë në takimin me Ramën nuk e duan qeverinë por ndihen të detyruar.

Në fund, një tjetër protestues kërkoi hetim nga SPAK për politikanët që kanë vjedhur taksat. Protesta shënoi edhe një përplasje te kryqëzimi i Kryeministrisë mes pjesëmarrësve dhe një të riu që i ofendoi ata, por koordinatorët me megafon thirrën njerëzit që të mos binin pre e provokimit.

Burim: ATSH
— Redaksia ZHURMA