Çfarë kërkojnë banorët e Zvërnecit në protestën e tretë?

VLORE — Protestat kundër projektit të planifikuar në Zvërnec kanë hyrë në ditën e tretë radhazi, me banorë dhe qytetarë të zonës të mbledhur me pankarta dhe thirrje kundër realizimit të tij. Protestuesit shprehën shqetësim për ndikimin në mjedis, biodiversitet dhe pasuritë natyrore të zonës së mbrojtur.

Gjatë tubimit, qytetarët kërkuan nga institucionet përgjegjëse të dëgjojnë zërin e komunitetit lokal dhe të rishikojnë vendimin. Ata theksuan se zhvillimi ekonomik nuk duhet të realizohet në dëm të trashëgimisë natyrore dhe ekosistemit të Zvërnecit.

Protestuesit paraqitën pesë kërkesa drejtuar Qeverisë: dorëheqjen e qeverisë, shfuqizimin e statusit të investitorëve strategjikë, shfuqizimin e Paketës së Maleve, anulimin e ndryshimeve në Ligjin për Zonat e Mbrojtura dhe anulimin e ndryshimeve në Ligjin për Trashëgiminë Kulturore. Organizatorët thanë se ndryshimet ligjore të miratuara së fundmi favorizojnë projekte që mund të cenojnë interesin publik dhe mjedisin.

Protesta u zhvillua pa incidente. Organizatorët paralajmëruan se kundërshtimi do të vazhdojë nëse kërkesat nuk merren parasysh nga autoritetet.

Burim: Telegrafi
— Redaksia ZHURMA