Çfarë kërkon protesta e 24-të në Tiranë?

TIRANË — Aktivisti Edison Lika ka lexuar në nisje të protestës së 24-të deklaratën me pikat dhe kërkesat e protestës, duke u shprehur se deklarata e lexuar dje nga Dritan Goxhaj "frikësoi kryeministrin Rama që u mor personalisht me të dhe me të tjerë".

Lika tha se për këtë arsye do të bëhet e udhës që ajo të lexohet në çdo protestë. "Do e bëjmë të udhës ta lexojmë çdo ditë dhe t'ja bëjmë të ditur pse jemi për 24 ditësh në shesh", deklaroi ai.

Protesta kërkon dorëheqjen e panegociueshme të kryeministrit dhe të qeverisë, krijimin e një qeverie teknike tranzitore jopartiake me mandat 12-mujor, dhe ndryshime kushtetuese të miratuara me referendum popullor. Këto përfshijnë ndryshimin e Kodit Zgjedhor, kufizimin e kryeministrit në jo më shumë se dy mandate, dhe ndryshimin e ligjit për financimin e partive.

Kërkesat fillestare mbeten në fuqi: anulimin e ndryshimeve në ligjin për zonat e mbrojtura dhe atë për trashëgiminë kulturore, shfuqizimin e Paketës së Maleve dhe të statusit për investimet strategjike, si dhe një kontratë të re sociale të përpiluar pas konsultimit me ekspertë dhe qytetarë apartiakë.

Burim: Report Tv, https://report.al/aktivisti-deklarata-jone-ka-trembur-kryeministrin-u-mor-personalisht-me-disa-prej-nesh/
— Redaksia ZHURMA