Çfarë kërkojnë aktivistët në protestat e nesër para Parlamentit?

TIRANË — Aktivisti Andi Tepelena u ka bërë thirrje qytetarëve që t'i bashkohen protestës së parashikuar për nesër para Parlamentit, duke paralajmëruar një aksion simbolik me vezë dhe miell. Në deklaratën e tij, Tepelena ftoi protestuesit të marrin me vete vezë dhe miell, duke e cilësuar këtë si një mënyrë simbolike për të shprehur pakënaqësinë ndaj Kuvendit. “Dua të përsëris thirrjen për nesër. Nesër me vezë, me miell me vete dhe ta gatuajmë bashkë brumin e demokracisë. Do të dalim aty për t’i treguar atij parlamenti që nuk janë përfaqësuesit tanë, ata nuk na përfaqësojnë ne”, u shpreh ai.

Aktivisti Andi Tepelena deklaroi se protestuesit kërkojnë zgjedhje të ndershme, reformë elektorale dhe mekanizma që, sipas tij, forcojnë pjesëmarrjen e qytetarëve në vendimmarrje. Sipas aktivistit, protesta synon të kërkojë një reformë të sistemit politik dhe zgjedhor, me fokus garantimin e votës së lirë dhe të barabartë për çdo qytetar. Ai tha se objektivi është ndërtimi i një “Republike të Re”, ku qytetari të jetë në qendër të vendimmarrjes.

Në fund të deklaratës, ai u bëri thirrje qytetarëve të marrin pjesë në protestë, duke i ftuar të mos tremben nga masat e sigurisë dhe të protestojnë në mënyrë të vendosur për kërkesat e tyre. Burim: Report Tv, https://report.al/aktivisti-ne-proteste-neser-me-veze-dhe-miell-para-parlamentit-do-gatuajme-demokracine-e-re/ — Redaksia ZHURMA