Protesta masive në Itali kundër shtrenjtimit dhe riarmatimit
Mijëra qytetarë në disa qytete italiane kanë protestuar kundër rritjes së kostos së jetesës dhe shpenzimeve ushtarake.
Redaksia ZHURMA · · 1 min lexim
Qytetarët kanëmbushur rrugët në Torino, Milano, Romë, Bolonjë, Xhenova, Firence, Udine dhe Leçe për të kundërshtuar rritjen e kostos së jetesës, shtrenjtimin e qirave, shpenzimet për riarmatimin dhe shkurtimet në arsim e shëndetësi. Në këto marshime janë përfshirë studentë, punëtorë, mësues dhe fermerë, të cilët kanë kërkuar më shumë mbështetje ekonomike dhe mbrojtje të shërbimeve publike.
Protesta më e madhe është regjistruar në Torino me rreth 3 mijë pjesëmarrës, ku u mbajtën pankarta kundër politikave të riarmatimit dhe u lëshuan thirrje kundër kryeministres Giorgia Meloni dhe ministrit Matteo Salvini. Në Milano, studentët organizuan një tjetër protestë dhe te Arco della Pace u zhvillua aktivitet për një barrë më të madhe fiskale ndaj shtresave të pasura, ndërsa në Romë marshimi nisi nga Kodra Esquilino drejt Forumeve Perandorake dhe në Xhenova u kundërshtuan shkurtimet në shërbimet publike.
Pavarësisht pjesëmarrjes së gjerë, demonstratat në qytetet italiane u zhvilluan përgjithësisht në mënyrë paqësore dhe pa përplasje të mëdha me policinë. Ndërkohë, në Torino, policia sekuestroi lëndë piroteknike në banesën e një personi disa orë para nisjes së protestave.
