Çfarë mesazhe dërgon Prishtina për SHBA-në në jubileun e 250-vjetorit?

PRISHTINË — Shoqata e Miqësisë së Amerikës përcjell mesazhe mirënjohjeje për Shtetet e Bashkuara në jubileun e 250-vjetorit të Pavarësisë amerikane. Aktiviteti shënues u organizua të shtunën pranë shtatores së ish-presidentit Bill Clinton, ku Agim Rexhepi, kryetari i shoqatës, tha se në emër të miliona qytetarëve shqiptarë me respekt e dashuri për SHBA-në, i uroi vendit 4 Korrikun dhe jubileun e madh.

Rexhepi tha se aktiviteti u bë në koordinim me institucionet përkatëse, teksa u informuan njëkohësisht edhe institucione shumë të larta në Shtetet e Bashkuara. Fotografitë e ngjarjes do t'u dërgohen përfaqësuesve dhe liderëve shumë të lartë amerikanë. Shoqata prezantoi edhe një foto-ekspozitë me fotografi ekskluzive të vendosura në korniza dhe të shoqëruara me mesazhe dedikuese për këtë përvjetor.

Me rastin e jubileut, shoqata u shpërndau qytetarëve kartolina të plastifikuara, të përgatitura posaçërisht për këtë përvjetor. Kartolinat mbanin portretet e tre ish-presidentëve amerikanë: George H. W. Bush, Bill Clinton dhe George W. Bush.

Në ngjarje morën pjesë përfaqësues të Gardës së Policisë së Kosovës, Njësisë Speciale Operative, Njësisë Intervenuese, Njësisë Speciale K9, si dhe zjarrfikës dhe përfaqësues të Qendrës së Mjekësisë Emergjente.

Burim: Gazeta Dukagjini
— Redaksia ZHURMA