Policia sqaron ndërhyrjen e RENEA-s dhe njofton për 27 të arrestuar në Tiranë

Policia e Shtetit njoftoi se 27 persona janë arrestuar dhe 27 të tjerë janë proceduar penalisht në Tiranë pas përplasjeve gjatë protestave të ditëve të fundit. Sipas autoriteteve zyrtare, nga sulmet e së shtunës janë lënduar 37 punonjës policie, ndërsa forcat speciale RENEA u angazhuan në terren pas një telefonate në sallën operative për persona të armatosur mes protestuesve.

Ky zhvillim vjen pas masave të marra nga autoritetet për disiplinimin e forcave të rendit. Paraprakisht, policia kishte vendosur pezullimin nga detyra të dy efektivëve pas publikimit të pamjeve filmike që shfaqnin përdorim dhune gjatë menaxhimit të protestës.

Sipas njoftimit zyrtar të Policisë së Shtetit, gjatë veprimeve hetimore në kryeqytet janë shoqëruar gjithsej 54 persona, ku gjysma e tyre u arrestua dhe gjysma tjetër u procedua në gjendje të lirë për akte dhune, shkatërrim të pronës dhe sulme ndaj uniformave të kalta. Po ashtu, autoritetet bënë të ditur se ndërhyrje policore janë kryer edhe në rrethe, ku në Shkodër dhe Vlorë janë proceduar penalisht 19 persona për veprime të kundërligjshme gjatë tubimeve. Gjatë kontrollit të territorit dhe këqyrjes së vendeve të ngjarjes, hetuesit sekuestruan një karikator me fishekë luftarakë, dy bomba Molotov, doza kanabisi, si dhe objekte të ndryshme si vida, sfera metalike, gurë e pllaka guri të përdorura ndaj efektivëve.

Autoritetet njoftuan se ekspertët po punojnë për identifikimin e të gjithë personave të maskuar që kryen akte dhunshme, përmes këqyrjes së detajuar të pamjeve filmike dhe sekuestrimit të provave materiale. Policia e Shtetit u bëri thirrje publike prindërve që të mos lejojnë pjesëmarrjen e fëmijëve të tyre në tubime për shkak të rrezikut për jetën, ndërsa i kërkoi protestuesve të distancohen nga personat me maska apo që fshehin identitetin me shall.

Albert Nushi, shef i Sektorit të Drejtimit në Departamentin e Sigurisë Publike, deklaroi se dislokimi i njësisë speciale erdhi për të mbrojtur jetën e efektivëve të paarmatosur. Ai sqaroi se «ditën e djeshme, në sallën operative të Drejtorisë Vendore të Policisë Tiranë ka ardhur një telefonatë, sipas së cilës, mes protestuesve kishte elementë të armatosur dhe po qëllohej me armë zjarri në momentin e sulmeve me lëndë piroteknike ndaj Policisë». Nushi hodhi poshtë pretendimet për praninë e forcave të huaja, duke thënë se «lajmet e publikuara se kanë ardhur oficerë nga policitë partnere për të menaxhuar tubimin, janë tërësisht të pavërteta». Zyrtari i policisë shtoi se protestuesit i dhanë zjarr hyrjes së Gjykatës së Lartë dhe ththyen xhamat e selisë së PS-së, çka solli përdorimin e kufizuar të ujit, gazit lotsjellës dhe pajisjeve speciale.