Policia në kërkim të rusit të dyshuar për vrasjen e trefishtë në Malin e Zi

Një ngjarje e rëndë ka tronditur Malin e Zi, ku tre persona u gjetën të vrarë me armë zjarri në një poligon qitjeje në Danilovgrad. Policia e vendit ka nisur kërkimet për autorin e dyshuar, një shtetas rus 30-vjeçar, i cili konsiderohet i armatosur dhe është larguar nga vendi i ngjarjes.

Viktimat janë identifikuar si Petar Globareviç, 24 vjeç, Nemanja Kapor, 20 vjeç, të dy nga Podgorica, dhe Momir Radonjiç, 67 vjeç, nga Danilovgradi. Autoritetet kanë bërë thirrje qytetarëve që të mos i afrohen të dyshuarit dhe të raportojnë çdo informacion në numrin 122, ndërsa operacioni për kapjen e tij vijon.

Mediat raportojnë se i dyshuari mund të jetë larguar me një automjet tip “Seat Cordoba”, në pronësi të babait të njërit prej viktimave. Policia po verifikon këtë mundësi dhe ka paralajmëruar qytetarët të qëndrojnë në shtëpi deri në përfundim të operacionit.