Bajrami kërkon përgjegjësi për mospërfundimin e rrugës Prishtinë-Podujevë

PODUJEVË — Deputetja e Lidhjes Demokratike të Kosovës, Hykmete Bajrami, ka kërkuar përgjegjësi për mospërfundimin e rrugës magjistrale Prishtinë-Podujevë, duke ia rikujtuar kryeministrit Albin Kurti premtimin se kjo aks rrugor do të kryhej në vitin 2022. Përmes një postimi në rrjetin social Facebook, ajo vuri në dukje se rruga vazhdon të jetë e papërfunduar dhe se janë humbur mbi 20 miliardë euro buxhet gjatë gjashtë viteve.

Më 2 nëntor 2021, kryeministri Albin Kurti, i shoqëruar nga kryetari i atëhershëm i Komunës së Podujevës, Shpejtim Bulliqi, kishin inspektuar punimet në këtë aks infrastrukturor. Bajrami publikoi edhe një video-lajm nga ajo vizitë, ku shefi i qeverisë kishte kritikuar vonesat e mëparshme dhe ishte zotuar publikisht për përmbylljen e të gjitha punimeve të nevojshme gjatë vitit pasues.

Sipas deklaratës së kryeministrit të bërë më 2 nëntor 2021 gjatë inspektimit, sektori 2 i rrugës ishte paraparë të përfundonte deri në fund të atij viti. Ai kishte thënë se në vitin 2022 do të përmbylleshin komplet punimet në mënyrë që rruga që lidh Llapin me Kryeqytetin të ishte plotësisht e përfunduar, duke e cilësuar zvarritjen e mëparshme si të dëmshme dhe të paarsyeshme.

Deputetja e LDK-së reagoi pasi, sipas saj, sot e kësaj dite infrastruktura mbetet e papërfunduar pavarësisht zotimeve të dhëna vite më parë. Bajrami e cilësoi të papranueshme këtë situatë dhe theksoi se buxheti i shpenzuar gjatë kësaj periudhe nuk ka lënë asnjë shenjë në vend.

«Më 2 nëntor 2021, Albin Kurti premtoi se rruga Prishtinë – Podujevë do të përfundonte në vitin 2022. Sot, gati pas pesë vitesh rruga ende nuk ka përfundu. Gjashtë vjet e mbi 20 miliardë Euro buxhet të humbura pa lënë asnjë shënjë në këtë vend. Përgjegjësi», ka shkruar Bajrami.