Pse duhet t'u lejohet pensionistëve të punojnë pa humbur pensionin?

SHKUP — Drejtori i Fondit për Sigurim Pensional dhe Invalidor (PIOM), Nikolla Memov, propozoi ndryshime ligjore që do t'u mundësonin pensionistëve të punësohen edhe pas daljes në pension, sidomos në sektorin privat. Propozimi doli nga tryeza e rrumbullakët kushtuar mungesës së fuqisë punëtore dhe mundësive për plakje aktive.

Memov theksoi se tregu i punës ka nevojë për kuadro me përvojë dhe pensionistët mund të japin kontribut të rëndësishëm, përfshirë edhe sektorin e sigurimit privat. Sipas tij, ndryshimet do të sillnin përfitime trepalëshe: punëdhënësit do siguronin staf të kualifikuar, shteti do merrte të ardhura shtesë nga kontributet dhe taksat, ndërsa pensionistët do merrnin njëkohësisht pension dhe pagë.

Profesori Lazar Jovevski vlerësoi se mungesa e fuqisë punëtore është një nga sfidat kryesore për zhvillimin e ardhshëm të Maqedonisë, dhe sugjeroi dy rrugë: importi i punëtorëve ose shfrytëzimi më i mirë i burimeve njerëzore vendore. Kryetarja e Odës së Sigurimit Privat, Verica Mileska-Stefanovska, tha se sektori tashmë ka mungesë serioze punëtorësh.

Mileska-Stefanovska kujtoi se në disa vende të rajonit pensionistët punojnë pa humbur të drejtën e pensionit. Të gjithë pjesëmarrësit u pajtuan se nevojiten ndryshime ligjore që do të mundësojnë përfshirje më të madhe të pensionistëve në tregun e punës dhe do të ndihmojnë në zbutjen e mungesës së kuadrove në sektorin privat.

Burim: Tetova Sot
— Redaksia ZHURMA