Petraj: Protesta e opozitës ka mbyllur ciklin e saj dhe u shkatërrua nga dhuna

I ftuar në emisionin «Ora e Fundit» në ABC News Albania, avokati Edmond Petraj ka diskutuar rreth zhvillimeve të fundit të lidhura me protestat e opozitës dhe rolin e Sali Berishës. Sipas tij, tubimet e thirrura shërbejnë vetëm si një formë për të mbajtur të karikuar elektoratin deri në ditën e zgjedhjeve dhe për t'i dhënë atyre shpresë për ndryshim.

Petraj u shpreh se «protesta e mbylli ciklin e vet» dhe se ajo kaloi një fazë rënieje pasi nuk u organizua në ditët e para ashtu siç duhej. Ai shtoi se protestat u dëmtuan nga dhuna dhe kërkesat e gabuara politike: «Protestën e shkatërroi ajo dhuna e keqe, thirrje të palogjikshme, kërkesa të palogjikshme.» Sipas analizës së tij, kërkesa për dorëheqjen e kryeministrit Rama e filloi historinë nga bishti dhe përfundimisht e forcoi atë dhe Partinë Socialiste.