Çfarë propozojnë pesë shtete të BE-së për integrimin e Ballkanit?

BRUKSEL — Pesë shtete të Bashkimit Evropian kanë propozuar një model të anëtarësimit "hap pas hapi" për vendet e Ballkanit Perëndimor, ku bën pjesë Kosova, me synimin për t'i afruar gradualisht ato me tregun e përbashkët evropian dhe për të kufizuar ndikimin rus në rajon, raporton "Euractiv".

Në një dokument konfidencial të shpërndarë mes 27 vendeve anëtare të BE-së, Austria, Çekia, Italia, Sllovakia dhe Sllovenia kanë kërkuar nga Komisioni Evropian që të rishqyrtojë mënyrën se si vendet kandidate përfshihen në tregun unik evropian. "Për të ruajtur momentumin e zgjerimit dhe për të avancuar integrimin evropian, nevojiten stimuj të fortë dhe tërheqës", thuhet në dokument.

Modeli i quajtur "integrim sistematik sektorial" parasheh që Shqipëria, Mali i Zi, Maqedonia e Veriut dhe Serbia të përfshihen gradualisht, sektor pas sektori, në programe të BE-së teksa harmonizojnë legjislacionin e tyre. Mes sektorëve të përmendur janë transporti, energjia, tregu digjital dhe politikat për konkurrencë. Propozohen gjithashtu mekanizma mbrojtës në rast se ndonjë shtet bën hapa prapa në reforma.

Dokumenti nuk i plotëson idetë e propozuara nga Shqipëria. Ministri i Jashtëm Ferit Hoxha, në një intervistë me "Euractiv" javën e kaluar, sugjeroi që vendet kandidate të fitojnë statusin e vëzhguesit në organet e BE-së ndërsa mbyllin kapitujt. Analisti Milan Niq nga Këshilli Gjerman për Marrëdhënie me Jashtë vlerëson se dokumenti duket si "një version më i sofistikuar i koncepteve të mëhershme për integrim të pjesshëm".

Autorët i kanë bërë thirrje komisioneres për Zgjerim, Marta Kos, që të hartojë ide të reja. Nga vendet e Ballkanit Perëndimor, Kosova mbetet në fazën më të hershme — aplikoi zyrtarisht për anëtarësim në fund të vitit 2022, por ende nuk ka marrë statusin e vendit kandidat.

Burim: Koha.net
— Redaksia ZHURMA