Trajneri i Irlandës: Do të ishim të lumtur edhe me një barazim ndaj Kosovës

Përzgjedhësi i Kombëtares së Irlandës, Heimir Hallgrimson, ka vlerësuar lart Kosovën në konferencën për media para ndeshjes së nesërme në stadiumin “Fadil Vokrri”, në kuadër të Ligës së Kombeve. Ai ka theksuar se skuadra e tij do të ishte e kënaqur edhe me një barazim në Prishtinë.

“Padyshim që do të jetë një ndeshje e vështirë për ne, të gjithë e dimë këtë. I kemi analizuar mjaft mirë dhe i kemi shqyrtuar pikat e tyre të forta, të cilat i kanë shumë. Do të ishim të lumtur të fitonim këtu edhe një barazim, ndeshja e parë e një turneu”, ka deklaruar Hallgrimson.

Trajneri irlandez ka folur edhe për zhvillimin e Kombëtares së Kosovës, duke e cilësuar si të jashtëzakonshme rritjen e saj në vitet e fundit. “Para së gjithash, jam impresionuar duke parë rritjen nga viti 2016, kur ishin të 190-të në renditjen e FIFA-s, sot janë në vendin e 78-të, kështu që kjo është një rritje e jashtëzakonshme. Shumë mirë për federatën këtu për mënyrën se si i kanë zhvilluar lojtarët e tyre”, është shprehur ai.

Duke u ndalur te përgatitjet e ekipit të tij, Hallgrimson ka theksuar se gjithçka varet nga mënyra se si luajnë dhe se lojtarët janë gati për këtë sfidë. “Sigurisht, duhet të përqendrohemi në lojën kundër tyre. Kjo është një detyrë e vështirë për momentin. Por kur bëhet fjalë për ndeshjen, do të jemi plotësisht të gatshëm për atë që do të vijë”, ka shtuar ai.

Burimet: Gazeta Metro; Epoka e Re; Sinjali; Telegrafi.