Pse përdorimi i kokainës po rritet alarmueshëm në Kosovë?

PRISHTINË — Përdorimi i kokainës dhe variantit të saj „krak-kokainë“ po rritet me shpejtësi në Kosovë, duke shkaktuar varësi të menjëhershme dhe rritje të agresivitetit tek përdoruesit. Kjo është një nga shqetësimet kryesore të diskutuara në Ditën Ndërkombëtare kundër Abuzimit me Droga, të organizuar nga organizata „Labyrinth“.

Safet Blakaj, drejtori ekzekutiv i „Labyrinth“, ka theksuar se kokaina dhe derivatet e saj janë bërë problem i madh, veçanërisht për shkak të varësisë së shpejtë që shkaktojnë. „Krak-kokaina krijon varësi shumë të shpejtë, por rrit edhe agresivitetin tek personat që e përdorin“, ka deklaruar ai.

Blakaj ka vënë në dukje edhe rritjen e përdorimit të ekstazisë gjatë sezonit të verës, si dhe drogave stimuluese si amfetamina dhe metamfetamina. Këto substanca, sipas tij, po përhapen me ritme të shpejta, duke rritur shqetësimet për shëndetin publik.

Nga ana tjetër, Faruk Bunjaku nga Drejtoria kundër Drogave në Polici ka theksuar suksesin e planit operativ „Siguria në shkolla“, i cili ka përmirësuar sigurinë rreth institucioneve arsimore. „Policë në rroba civile janë prezentë në dhe përreth shkollave, duke komunikuar me stafin dhe duke siguruar një ambient më të mirë për nxënësit“, ka shpjeguar Bunjaku.

Bunjaku ka shtuar se, megjithëse nuk ka rritje të përdoruesve të heroinës, abuzimi me metadonin mbetet problem serioz, pasi kjo substancë shkakton vdekje të hershme. Ai ka theksuar se Drejtoria e Drogave ka rritur stafin dhe prezencën në terren për të luftuar trafikun dhe përdorimin e paligjshëm të drogave.

Albulena Haxhiu, ushtruese e detyrës së presidentes, ka premtuar se do të adresojë çështjen e mungesës së qendrave të rehabilitimit për personat e varur nga droga. „Do ta adresoj edhe sot që Kosova të ketë një qendër profesionale për trajtimin e varësisë“, ka thënë ajo, duke marrë zotime nga Ministria e Punëve të Brendshme dhe Shëndetësisë.

Ministria e Punëve të Brendshme ka njoftuar se gjatë këtij muaji do të zhvillohen aktivitete vetëdijesuese për të zvogëluar numrin e përdoruesve të drogave. Burim: Koha.net
— Redaksia ZHURMA