Pse Parlamenti Evropian nënvizon 'politizimin' e KQZ-së e KPM-së?
Raporti i miratuar më 17 qershor kërkon 'emërime mbi bazë merite' dhe transparencë në rekrutim për institucionet e pavarura të Kosovës.
BRUKSEL — Kapja e institucioneve të pavarura në Kosovë është shqetësim edhe për Parlamentin Evropian. Raporti i miratuar më 17 qershor nënvizon veçanërisht "politizimin e institucioneve të pavarura", duke përfshirë shprehimisht Komisionin Qendror të Zgjedhjeve.
PE shprehet me "keqardhje për përpjekjet e vazhdueshme për politizimin" dhe i kërkon Kosovës të "sigurojë emërime mbi bazë merite" e "transparencë në procedurat e rekrutimit", me respekt të plotë për pavarësinë e këtyre institucioneve.
Raporti u bën thirrje autoriteteve gjithashtu të harmonizojnë kornizën ligjore që rregullon Komisionin e Pavarur për Media me rekomandimet e Këshillit të Evropës dhe standardet e BE-së — për të forcuar "pavarësinë rregullatore, sigurinë juridike dhe besimin publik në mbikëqyrjen e mediave".
VOX Kosova ka raportuar ekskluzivisht se ndërmarrjet publike janë shndërruar "në çerdhe punësimesh partiake". Mes provave të publikuara: bisedat në WhatsApp të ministrave Artane Rizvanolli e Albulena Haxhiu me kryeshefin e "Ibër-Lepencit", Faruk Mujka — i caktuar në detyrë me urdhra partiakë.
Burim: Vox Kosova
— Redaksia ZHURMA