PD kërkon edhe 3 muaj për Komisionin e Reformës Territoriale

TIRANË — Bashkëkryetari i Partisë Demokratike, Luçiano Boçi, i ka drejtuar një kërkesë zyrtare Kryetarit të Kuvendit, Niko Peleshi, dhe Konferencës së Kryetarëve, duke kërkuar zgjatjen me tre muaj të mandatit të Komisionit të Posaçëm Parlamentar për Reformën Administrativo-Territoriale. Kërkesa u depozitua këtë të enjte pranë Kuvendit.

Sipas dokumentit zyrtar të depozituar, zgjatja arsyetohet me nevojën për të vazhduar punën edhe gjatë muajit gusht, me qëllim përmbushjen e plotë të detyrimeve dhe objektivave të parashikuara në projektkalendarin e punës të Komisionit.

Boçi argumenton se një pjesë e konsiderueshme e aktiviteteve thelbësore të Komisionit nuk është realizuar ende. Për këtë arsye, thotë ai, është e nevojshme më shumë kohë përpara se puna të konsiderohet e mbyllur.

Kërkesa përmban dy pika kryesore: zgjatjen e mandatit me tre muaj, në mënyrë që Komisioni të vazhdojë punën edhe gjatë gushtit, dhe marrjen e opinionit zyrtar nga Kongresi i Autoriteteve Lokale dhe Rajonale të Këshillit të Evropës mbi rekomandimet dhe sugjerimet e Komisionit.

Ky opinion duhet marrë përpara se projektpropozimi përfundimtar i reformës territoriale të kalojë për votim në Kuvend. Konferenca e Kryetarëve, që do ta shqyrtojë kërkesën e Boçit, mblidhet të enjten në orën 9:00, në ambientet e Kuvendit.

Nëse propozimi miratohet nga Konferenca e Kryetarëve, afati i Komisionit shtyhet edhe një herë përpara se çështja e reformës territoriale të marrë formën përfundimtare në Kuvend.

Burim: Euronews Albania
— Redaksia ZHURMA