Parandalohet futja e narkotikëve në Qendrën e Paraburgimit në Prishtinë
Zyrtarët korrektues zbulojnë substancë të dyshuar narkotike të fshehur në xhaketën e një familjari gjatë vizitës.
Redaksia ZHURMA · · 1 min lexim
PRISHTINË — Shërbimi Korrektues i Kosovës njofton se zyrtarët korrektues kanë parandaluar futjen e një substance të dyshuar narkotike në Qendrën e Paraburgimit në Prishtinë. Sipas njoftimit zyrtar, lënda e dyshuar u zbulua gjatë kontrollit në sallën e vizitave, pasi ishte fshehur brenda xhaketës së një familjari që kishte shkuar për të vizituar një të burgosur.
Pas këtij zbulimi, vizita u anulua menjëherë, ndërsa u njoftua Policia e Kosovës, së cilës iu dorëzua substanca e dyshuar për hapat e mëtejshëm. Shërbimi Korrektues i Kosovës thekson se do të vazhdojë të zbatojë kontrolle dhe masa të rrepta sigurie për të ndaluar futjen e çdo sendi apo substance të paligjshme në institucionet korrektuese.
