Paga mesatare rritet, por gjysma e punonjësve marrin më pak se 60 mijë lekë neto

TIRANË — Dinamika e pagave në tregun e punës shqiptar ka vijuar trendin rritës edhe në fillim të 2026, duke reflektuar nevojën e bizneseve për të konkurruar në kushtet e mungesës së fuqisë punëtore. Sipas të dhënave të INSTAT, paga mesatare bruto arriti në 90,119 lekë në tremujorin e parë, me rritje vjetore 9.6%.

Por paga mediane, që tregon shpërndarjen reale të të ardhurave, ishte 74,010 lekë bruto, domethënë 50% e punonjësve marrin më pak se kjo shifër. Në terma neto, pas zbritjeve të kontributeve dhe tatimeve, gjysma e forcës punëtore fiton nën rreth 60,000 lekë në muaj.

Rritja më e fortë u regjistrua në këtë tremujor, ku paga mediane u rrit me 11.2% krahasuar me fundin e 2025, si rrjedhojë e efekteve të pagës minimale që ka sjellë një efekt zinxhir në të gjitha kategoritë. Ndërkohë, paga mesatare ishte 18% më e lartë se mediana, por diferenca u ngushtua.

Ekspertët e ekonomisë shpjegojnë se ngushtimi i diferencës ndodhi sepse pagat e ulëta dhe të mesme u rritën më shpejt se ato shumë të larta, të cilat zakonisht anojnë treguesin e mesatares. Megjithatë, shifra prej 60 mijë lekësh neto mbetet një sfidë e hapur për konsumin dhe fuqinë blerëse.

Për një person që jeton i vetëm dhe duhet të paguajë qira, kjo pagë mjafton vetëm për mbijetesën dhe nevojat më kritike ekzistenciale. Pjesa më e madhe e të ardhurave, pothuajse gjysma, shkon menjëherë për strehimin, sidomos në një treg me kosto në rritje si ai i Tiranës.

Nëse individi nuk ka shpenzime strehimi, e njëjta pagë ofron një jetesë më të qëndrueshme, por vetëm si pagë e dytë brenda familjeve ose për të rinj që sapo hedhin hapat e parë në tregun e punës pa ngarkesa familjare. Përllogaritjet tregojnë se për një jetë me dinjitet, nevojiten të ardhura më të larta.

Ky realitet thekson se rritja e pagave, megjithëse e mirëseardhur, nuk e kompenson mjaftueshëm koston e jetesës in rritje, duke lënë gjysmën e popullsisë punëdhënëse me të ardhura modeste. Politikat duhet të adresojnë jo vetëm numrat, por edhe pabarazinë e theksuar në treg.

Burim: BalkanWeb
— Redaksia ZHURMA