Osmani: Ka përpjekje për rikthimin e masave të BE-së ndaj Kosovës

Presidentja e vendit ka paralajmëruar se ekzistojnë përpjekje dhe se po diskutohet në disa kryeqytete evropiane për rikthimin e masave të Bashkimit Evropian ndaj Kosovës. Sipas saj, këto diskutime po ndodhën për arsye të Ligjit për Specialen, ndërsa ka marrë konfirmime rreth kësaj çështjeje.

Gjatë një paraqitjeje në emisionin «ADRESA» në Kanal 10, ajo ka theksuar se ende nuk dihet nëse karakteri i këtyre masave të mundshme do të jetë ekonomik apo politik. «Mua më janë konfirmuar se po diskutohet që Kosovës t’i rikthehen masat, e kjo po ndodh për arsyen e Ligjit për Specialen», u shpreh ajo.

Në prononcimin e saj, ajo ka shtuar se i kundërshton këto masa tani njësoj si në të kaluarën, duke argumentuar se qytetarët nuk duhet të dëmtohen për fajin e politikanëve.