Policia e Vlorës arreston 2 persona, sekuestron armë dhe drogë

VLORË — Në kuadër të masave për garantimin e sigurisë publike dhe mbarëvajtjen e sezonit turistik, Policia e Vlorës ka finalizuar operacionin e koduar "Siguria", duke goditur tre raste të armëmbajtjes pa leje dhe shitjes së lëndëve narkotike në qytet dhe në zonat bregdetare. Operacioni u realizua nga specialistët e Seksionit për Hetimin e Narkotikëve, në bashkëpunim me Forcën e Posaçme Operacionale.

Si rezultat, u arrestuan dy persona: T. P., 33 vjeç, banues në Vlorë, me precedent penal për prodhim dhe shitje të lëndëve narkotike, dhe A. C., 18 vjeç, i cili u kap në Dhërmi. Gjatë kontrollit në automjetin dhe banesën e T. P., policia gjeti dhe sekuestroi një armë zjarri pistoletë, një krehër arme, 44 fishekë luftarakë të kalibrave të ndryshëm, si dhe një sasi të lëndës së dyshuar narkotike kokainë, të ndarë në doza dhe gati për shitje.

A. C., 18 vjeç, u arrestua në Dhërmi në posedim të sasive të kokainës dhe Cannabis Sativa. Sipas policisë, lëndët narkotike dyshohet se ishin destinuar për shitje në zonën bregdetare dhe në qytetin e Vlorës. Policia bën me dije se kontrollet dhe operacionet në terren do të vijojnë, me fokus goditjen e paligjshmërive dhe rritjen e sigurisë gjatë sezonit turistik.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.

Burim: ABC News
— Redaksia ZHURMA