Maqedonia e Veriut regjistron të paktën 3 mijë filloristë më pak
Ministrja Vesna Janevska deklaroi se shifrat nuk janë përfundimtare për shkak të regjistrimit të gushtit, por trendi demografik mbetet shkatërrues.
SHKUP — Numri i nxënësve që regjistrohen në klasën e parë në Maqedoninë e Veriut këtë vit shkollor do të shënojë një rënie drastike prej të paktën 3,000 filloristësh në krahasim me vitin e kaluar. Lajmin e bëri të ditur sot ministrja e Arsimit dhe Shkencës, Vesna Janevska, duke konfirmuar krizën e thellë demografike.
Sipas të dhënave të paraqitura nga MASH, megjithëse procesi i regjistrimit nuk ka përfunduar ende për shkak të afatit të tretë në gusht, shifrat aktuale tregojnë rreth 4,900 filloristë më pak. Ministrja Janevska shpreson që ky numër të përmirësohet disi pas regjistrimeve të fundit, megjithëse situata mbetet demografikisht alarmante.
Në shkollat e mesme po ashtu shënohet ulje e numrit të nxënësve, por ministrja sqaroi se kjo rënie nuk është aq drastike sa në shkollat fillore. Ajo shtoi se autoritetet presin që ky trend negativ dhe shkatërrues për vendin të vazhdojë edhe gjatë vitit të ardhshëm shkollor.
Burim: Almakos
— Redaksia ZHURMA