Numërimi në qendrat komunale përfundon me ndryshime minimale
Si ndryshuan rezultatet e partive kryesore në Kosovë pas përmbylljes së numërimit të votave nëpër qendrat komunale?
PRISHTINË — Procesi i numërimit të votave për ata që votuan brenda Kosovës ka përfunduar nëpër qendrat komunale të numërimit. Këto rezultate të reja kanë shfaqur vetëm dallime të vogla me shifrat që u shpallën nga Komisioni Qendror i Zgjedhjeve (KQZ) mbrëmjen e së dielës.
Lëvizja Vetëvendosje ka shënuar një rritje të lehtë të mbështetjes pas këtij procesi të numërimit të votave. Ky subjekt që në rezultatet preliminare kishte 299,453 vota apo 42,96 për qind, pas numërimit në QKN iu shtuan edhe 193 vota shtesë, duke marrë gjithsej 299,646 vota apo 42,97 për qind.
Partia Demokratike e Kosovës po ashtu ka shënuar rritje të votave. Nga 147,325 vota apo 21,13 për qind që kishte në rezultatet preliminare, ajo mori 147,594 vota ose 21,17 për qind në QKN. Kjo rritje erdhi pasi këtij subjekti politik iu shtuan 269 vota të reja.
Lidhjes Demokratike të Kosovës iu shtuan 72 vota në QKN, duke shënuar rritje të lehtë. Kështu, ajo mori 122,780 vota apo 17,61 për qind nga ky proces, krahasuar me 122,708 vota ose 17,60 për qind sa kishte në rezultatet preliminare.
Aleanca gjithashtu pati 94 vota më shumë nga ky rinumërim. Në rezultatet preliminare ata morën 49,917 vota apo 7,16 për qind, ndërsa në QKN patën 50,011 vota apo 7,17 për qind sipas të dhënave pas përfundimit të numërimit.
Burim: Koha.net
— Redaksia ZHURMA