Pse u grumbulluan qytetarët para stacionit policor në Skënderaj?
Ish-deputetja Ganimete Musliu dhe qytetarë kërkojnë sqarime pse ka kaq shumë policë pasi dy persona u ndaluan për 48 orë për lëndim të lehtë trupor.
SKËNDERAJ — Njësi speciale policie kanë zbritur të enjten në mbrëmje në Skënderaj, pas një incidenti ku ishin të përfshirë kryetari i komunës Sami Lushtaku dhe kryetari i degës së LVV-së Hysni Mejani.
Prokuroria Themelore në Mitrovicë njoftoi se janë ndaluar për 48 orë dy persona me inicialet E.L. dhe B.N., të dyshuar për veprën penale "Lëndimi i lehtë trupor".
Trupat policore vazhduan të qëndronin në qytet, duke shtyrë qytetarët të grumbullohen para Stacionit të Policisë. Në mesin e tyre ishte ish-deputetja Ganimete Musliu, e cila kërkoi sqarim për prezencën e madhe policore. Nënkryetari i komunës Fadil Nura tha se "çdo shtetrrethim në këtë qytet zgjon kujtime që ky vend i ka paguar shtrenjtë."
Drejtoresha e Policisë për Rajonin e Mitrovicës, Afërdita Mikullovci, e ka quajtur vendosjen e Njësisë Speciale Operative "çështje rutinore policore dhe operative." Zyrtarë të PDK-së e kanë kundërshtuar si të panevojshme.
Burim: Gazeta Express, https://www.gazetaexpress.com/qytetaret-grumbullohen-para-stacionit-te-policise-kerkojne-te-dine-pse-ka-kaq-shume-police-ne-skenderaj/
— Redaksia ZHURMA