Nisja e punimeve për autostradën Shkup-Bllacë pritet më 26 gusht
Kryeministri Hristijan Mickoski ka paralajmëruar se në fund të muajit pritet të fillojë ndërtimi i pjesës së dytë të autostradës Shkup-Bllacë.
SHKUP — Pjesa e dytë e autostradës Shkup-Bllacë pritet të hyjë në fazën e ndërtimit në fund të këtij muaji, bëri të ditur kryeministri Hristijan Mickoski. Sipas tij, punimet janë parashikuar të nisin më 26 gusht, pasi tashmë janë plotësuar të gjitha kushtet e nevojshme për realizimin e projektit dhe kanë përfunduar të gjitha formalitetet e procedurat që lidhen me këtë segment.
Kryeministri shtoi se ky projekt ka një kontraktor që është kompani vendase, si dhe mbikëqyrje, ndaj çdo kusht për fillimin e ndërtimit të autostradës është përmbushur. Ndërkohë, ai njoftoi gjithashtu se ndërtimi i segmentit Bukojçan-Kërçovë pritet të nisë në shtator, kurse për autostradën Kërçovë-Ohër paralajmëroi intensifikim të punimeve dhe përfundimin e saj në mënyrë graduale.