Nis regjistrimi elektronik në shkollat e mesme publike në RMV

SHKUP — Ministria e Arsimit dhe Shkencës ka bërë të ditur se regjistrimi elektronik i nxënësve në shkollat e mesme publike në Maqedoninë e Veriut për vitin e ri akademik 2026/2027 ka filluar që nga dita e sotme. Ashtu si në vitet e kaluara, ky proces kryhet plotësisht në mënyrë elektronike përmes portalit zyrtar e-uslugi.mon.gov.mk.

Për të hyrë në sistem dhe për të kryer aplikimin, nxënësit duhet të shfrytëzojnë llogaritë e tyre ekzistuese të përdoruesit në platformën schools.mk. Gjatë muajit qershor janë planifikuar dy afate të ndryshme për regjistrimin elektronik të kandidatëve, me qëllim që të gjithë gjysmëmaturantët të kenë kohë të mjaftueshme për të aplikuar.

Regjistrimi i parë do të kryhet nga data 12 deri më 15 qershor, kurse dorëzimi i dokumentacionit fizik në shkollat përkatëse është caktuar për datat 16 dhe 17 qershor. Rezultatet përfundimtare dhe vendet e lira do të publikohen më 18 qershor, ndërsa regjistrimi i dytë do të organizohet më 23 qershor.

Për vitin akademik 2026/2027 janë shpallur gjithsej mbi 25,000 vende të lira në 109 shkolla të mesme publike. Sipas të dhënave zyrtare, më shumë se 17,000 vende janë të destinuara për arsimin profesional, pothuajse 6,000 në arsimin e mesëm të përgjithshëm dhe 570 vende në shkollat e artit.

Burim: Portalb
— Redaksia ZHURMA