Pse dyshon nëna e Mirel Çokajt se e zhdukën në mal?
Familjarët dyshojnë se vrasja e 40-vjeçarit në Malësinë e Madhe lidhet me konfliktet për parcelat e kanabisit.
KOZHNJË — Një humnerë në zonën e Kozhnjës së Malësisë së Madhe mban ende të fshehur rrethimet e vdekjes së Mirel Çokajt, 40 vjeç, më 18 shtator 2025. Zyrtarisht ngjarja është referuar si rrëzim aksidental, por familjarët hedhin dyshime të forta për një vrasje të lidhur me parcelat e kanabisit.
Trupi i pajetë u lokalizua fillimisht me dron nga policia, ndërsa nxjerrja u bë e mundur vetëm pas 24 orësh me helikopterin e Forcave të Ushtrisë. Telefoni celular i Çokajt nuk është gjetur ende. Sipas të afërmve, ai kishte ndryshuar itinerarin e zakonshëm dhe nuk duhej të rikthehej atë ditë nga parcela ku ruheshin qindra bimë kanabisi gati për korrje.
Motra e viktimës, Mirjana Çokaj, në intervistë për emisionin "Review" të Greta Topjanës, ka ngritur akuza të forta. Ajo rrëfen se më 17 shtator nëna i telefonoi se vëllai nuk përgjigjej. Kërkimet nisën në zonën malore, ndërsa bashkëpunëtori i viktimës, Gëzim Preldakaj, fillimisht refuzoi ta shoqëronte. "Në orën 07:15 u nda nga unë dhe po në atë orë më telefonoi se vëllai ishte rrëzuar dhe kishte vdekur. Tha se e kishte gjetur nëpërmjet telefonit", thotë Mirjana Çokaj.
Familjarët dyshojnë se Çokaj është vrarë pas "prishje pazaresh të drogës" me Preldakajn, ortakun që e ruanin bashkë kanabisin. "Telefoni i tij ende nuk është gjetur dhe aty ndoshta fshihet e vërteta", deklaron motra. Ata kërkojnë që hetimet të mos mbyllen si aksident.
Burim: Telegrafi
— Redaksia ZHURMA