Hegseth: Asnjë sekretar Mbrojtjeje s’është shkarkuar për operacione

Sekretari amerikan i Mbrojtjes, Pete Hegseth, ka përmendur ndërhyrjen e NATO-s në Kosovë në vitin 1999 gjatë një konference për media, duke mbrojtur ligjshmërinë e operacioneve ushtarake dhe duke kundërshtuar nismën e kongresistit republikan Thomas Massie për shkarkimin e tij. Përmendja e Kosovës lidhet me ndërhyrjen e NATO-s kundër forcave jugosllave gjatë administratës së presidentit Bill Clinton, të cilën ai e solli si shembull për vendimet e ligjshme të mbrojtjes.

Ndërhyrja e vitit 1999 në Kosovë ishte vendimtare për ndalimin e fushatës së forcave serbe dhe përfundimin e luftës, duke mundësuar vendosjen e pranisë ndërkombëtare të sigurisë. Deklarata e sekretarit amerikan të Mbrojtjes vjen gjithashtu në një periudhë tensionesh politike në Washington, ku ligjshmëria e operacioneve ushtarake të administratës aktuale është bërë objekt debati mes përfaqësuesve republikanë dhe demokratë.

Sipas njoftimeve të mediave, kongresisti Thomas Massie ka paraqitur tetë pika të akuzës kundër Hegseth, të cilat lidhen me përfshirjen ushtarake amerikane në Iran pa autorizimin e Kongresit, si dhe me operacionet në Jemen dhe Venezuelë. Kongresisti e akuzon sekretarin për zbatimin e urdhrave të paligjshëm dhe shkeljen e Kushtetutës amerikane, ndërsa Hegseth i ka hedhur poshtë këto pretendime, duke i cilësuar si të motivuara politikisht.

Në mbrojtje të qëndrimit të tij, Hegseth ka deklaruar: «Gjatë 250 vjetëve të republikës amerikane, asnjë sekretar i Luftës apo sekretar i Mbrojtjes nuk është përballur me shkarkim për kryerjen e operacioneve ushtarake të ligjshme. Asnjëherë. Jo gjatë Reaganit në Liban. Jo gjatë Clintonit në Kosovë. Jo gjatë Obamës në Irak apo Siri. Jo gjatë Bidenit në Irak apo Siri. Ky është standardi. Historia është e qartë».

Ai ka shtuar më tej se nisma e ndërmarrë përfshin mospajtime rreth politikave: «Kjo është ajo që po ndodh, mospajtime për politikat. Jo krime të rënda, jo kundërvajtje, jo tradhti, jo ryshfet dhe as lloji i shkeljeve që themeluesit e SHBA-së kishin parasysh kur hartuan klauzolën për shkarkimin nga detyra».