Mushkolaj: Kurti ka qeverisur vetëm me dy ministri dhe nuk ka mbajtur premtimet
Analisti kritikon projektbuxhetin dhe thekson se ekzekutivi nuk ka përfshirë zotimet e fushatës në planifikime.
Redaksia ZHURMA · · 2 min lexim
Analisti Imer Mushkolaj ka drejtuar kritika të ashpra ndaj projektbuxhetit të prezantuar nga Qeveria e Kosovës, duke deklaruar se dokumenti nuk i përfshin premtimet dhe zotimet e dhëna nga kryeministri Albin Kurti gjatë fushatës zgjedhore. I ftuar në emisionin Debat Plus në TV Dukagjini, ai ka vlerësuar se projektbuxheti dështon të pasqyrojë synimet qeveritare si për vitin e ardhshëm, ashtu edhe në projeksionet për vitet 2028 dhe 2029.
Mushkolaj ka ngritur shqetësimin rreth menaxhimit të parasë publike, duke kërkuar nga qytetarët që të kërkojnë llogari për shpenzimet e mëdha, veçanërisht për importin e energjisë elektrike. «Mos të harrojmë energjinë, se për energji, jo vetëm sivjet që pritet të harxhojmë qindra miliona, por edhe viteve të fundit kemi harxhuar qindra miliona për import», ka deklaruar ai, duke shtuar se mungojnë përgjigjet për fatin e premtimeve në sektorin energjetik dhe fusha të tjera.
Sipas analistit, puna e kryeministrit në ekzekutiv ka qenë tejet e kufizuar dhe e përqendruar vetëm në dy drejtime. «Nëse e shohim mënyrën se qysh është qeverisur deri tash, mendoj që kryeministri Kurti ka qeverisur vetëm me dy ministri, me ministrin Hekuran Murati, se i është dashur se qysh me i bërë paret me shpërnda pare te qytetarët, dhe ka qeverisur me Xhelal Sveçlën, me idenë e veriut», ka theksuar Mushkolaj, duke shtuar se në sektorët e tjerë nuk ka pasur qeverisje reale.
