Pse mungon demokracia në Shqipëri?

TIRANË — Avokati dhe politikani i njohur shqiptaro-britanik, Kastriot Berberi, i ftuar në "Programin e drekës" në News24, ka bërë një analizë të thellë të aktualitetit politik në Shqipëri. Ai u shpreh se, si socialist, vlerëson se "PS ka bërë shumë, por ka shumë për të bërë" dhe theksoi se i mungon thellësisht komunikimi dhe vendimmarrja nga baza. Berberi e ilustroi këtë me përvojën e tij në Partinë Laburiste në Britani, ku "baza janë ata që japin mendime dhe ekspertizën e tyre, kërkojnë llogari nga përfaqësuesit e tyre" dhe raportimi bëhet tek baza. "Kjo nuk ekziston në PS. Këtu qeveriset nga lart-poshtë," deklaroi ai, duke shtuar se "unë si socialist do e bëja PS që të qeverisej nga poshtë-lart."

Berberi theksoi se kjo qasje ka munguar historikisht jo vetëm te PS, por te të gjitha partitë në Shqipëri, duke shtuar se "asnjë parti në vend nuk është plotësisht demokratike" dhe se "shoqëria shqiptare mbetet ende e frikësuar, duke vendosur interesin personal para atij publik." Lidhur me lëvizjet e fundit qytetare dhe tubimet masive në kryeqytet, avokati i vlerësoi ato si "një tregues civilizimi" dhe "diçka të bukur dhe evropiane, perëndimore," por theksoi se "po shfrytëzohen për kapital politik nga forcat e reja apo të vogla" me qëllimin e vetëm "rrëzimin e qeverisë."

Sipas Berberit, strukturat e reja të drejtësisë, veçanërisht SPAK dhe organet e saj, "kanë filluar të japin rezultate konkrete në luftën kundër korrupsionit dhe thyerjen e mitit të pandëshkueshmërisë," duke rritur besimin e qytetarëve dhe numrin e ndëshkimeve. Ai paralajmëroi se "nëse një politikan në të ardhmen do mendojë të shkelë ligjin, do mendojë pasojat," megjithëse shtoi se "rruga mbetet ende e gjatë" dhe perceptimi është se "ka ndikim politik" në institucionet e drejtësisë.

Ambicien e qeverisë për të mbyllur kapitujt me BE-në brenda vitit 2027 avokati e cilësoi si "mjaft të madhe," por theksoi se rrethanat gjeopolitike po luajnë në favor të Shqipërisë. "BE po mbyllin syrin dhe veshin për standardet tona për arsye gjeopolitike," dhe "Shqipëria është bërë partneri më i rëndësishëm në Ballkan," deklaroi avokati, duke shtuar se rëndësi ka integrimi i popullit dhe jo se kush është në pushtet për të ardhmen e vendit.

*Burim: BalkanWeb, https://www.balkanweb.com/ps-qeveriset-nga-lart-poshte-mungon-demokracia-avokati-kastriot-berberi-protestat-sollen-nje-fryme-evropiane-ne-shqiperi-gjeopolitika-faktor-kyc-per-integrimin-ne-be/*

*— Redaksia ZHURMA*